Luk 22 | WSK | STEP | Juda nunga tom biya bo, Bread Yeast Mena ko tom, mu aratukko pingi aram. Tom biya mu ko nup bo “Passover” masan.

Luke 22

Judas Jesus kager kari nuguting te bitirukko ko den nungam

(Mat 26:1-5; Mark 14:1-2, 10-11; John 11:45-53)

1 Juda nunga tom biya bo, Bread Yeast Mena ko tom, mu aratukko pingi aram. Tom biya mu ko nup bo “Passover” masan. 2 Se priest bibiya se Law Den ko kausa kari alo nuna lage bo Jesus te ilumon ale momon se kuerukko wore ko tetela la iki gurugu se loagawakasan, mu awuk, nuna kariimet nunga nguangakasan.

3 Se Satan mu nu Judas Iscariot, olekem 12 mu nunga ningi bo, wore ko kumik ningi kasu naguram. 4 Se Judas namaram priest bibiya se temple ko kager kari nunga supuling alo arungak munakaram, ale nu aguwaya Jesus nuguting te bitirukko mu ko arungu munakakaso. 5 Se nuna ninguru amilmilaman, ale manga sang tumonko balman. 6 Se nu aing mam, ale tom kolopak bo, kariimet motam biya me bagomon ale me aringimonko mu te, nu Jesus nuna nuguting te bitirukko wore ko iki gurugu se loagawakaso.

Olekem ilagala Passover na nungurman

(Mat 26:17-25; Mark 14:12-21; John 13:21-30)

7 Mu Bread Yeast Mena ko tom biya, se Passover sipsip gotektek nunga momon se kuemonko tom tai aratam. 8 Se Jesus Peter John ilak nunga maonam, “Nina ilagala namaral anananga Passover inang nanakko mu nungalko,” mam.

9 Se nuna isarman, “Ana kuwim awuk bore te namanak ale na nunguru saganakko ya?”

10 Se nu nunga maonam, “Tom nina nama wonong biya sumu ningi kasu nagural namawa kari bo yu kuting biya yu ago mu giok ale taiwuruk se arigalko. Mu kowom kaoral ilak kawam nu te namoso mu te ilak namaralko. 11 Ale kawam kotam aninga den imi maonalko, ‘Kari Biya iwita nika isarnakko balam, “Kawam naung ani olekem arungak Passover inang te nanakko mu apoko ya?”’ iwita isualko. 12 Se nu ko kawam naung biya bo kualala, ko daiga kuwim terong la, mu ninga kausok se te Passover inang nungalko.”

13 Se nuna namaman ale mel Jesus te nunga maonam butata la aringiman, ale eng te Passover na nungurman.

Jesus ko olekem arungu Passover na naman

(Mat 26:26-30; Mark 14:22-26; 1 Corinth 11:23-25)

14 Tom tai aratam se Jesus ko apostle arungu na namonko dagiman. 15 Nu nunga maonam, “Aninga angamang biyala anikaso mu ani girek nina nengerak Passover inang nanak, ale asele ani ikup giekko. 16 Mu awuk, ani ninga manorsam, ani udagi Passover na me naik, am bagirik, se mel imi ko nunguning Kaem ko kingdom ningi aratuk asele.”

17 Ale nu waen bagunang ago mu bo tam, Kaem aru maonam, ale balam, “Nina waen imi tal ale ninimi tual ale nalko. 18 Mu awuk, ani ninga manorsam, ani udagi yu waen me naik baga Kaem ko kingdom tairuk asele.”

19 Ale nu bread tam, Kaem aru maonam, ale paogam, nungaru se balam, “Imi aninga angimik nunguning, ninga sangukko ningarsam. Nina nal ale ani ago ko iki se bagaralko.”

20 Nuna na inang no kutuwuman, asele udagi nu waen bagunang ago mu tam ale koma suwanta tala beteram ale nungaru se balam, “Imi aninga angimik gue, nina te ninga sangikko warem se kaparam, se Kaem ko den iru nina nego ko nungam wore te sokel tuam.

21 “Bare kari ani kager kari nuguting te aga bitirukko mu ani agarak na nowoso. 22 Batoga te aniso iwitata, Kari ko Kuriang kumik te aratukkowo. Bare kari kager kari nuguting te nu bitirukko, mu nu ikup yaman memek nunguningkiri taukkowo!”

23 Se olekem alo den mu ikiman ale nunumi isarukasan, “Ana ningi awiri buta bitirukko wore balso ya?” makasan, ale nongota nunumi isarukasan.

Olekem alo nunga ningi awiriya biya bagurukko wore ko den tagi gurugumukasan

24 Asele olekem alo baga awiriya nunga ningi biya bagurukko wore ko nunumi ilukasan. 25 Se Jesus nunga maonam, “Ali sor saki nunga king alo se nunga supuling bibiya nuna nunumi balsan 'kariimet nunga bitua saonga ko kari yawara' ko nunumi balsan, bare nuna nunga kariimet nunga ira kutuwusan se nuna nobowa ningi la bagasan. 26 Bare nina mu suwuta me beteralko! Kari awiriya nenenga ningi nup biya baguruk, mu nu kari nup mena iwita numi ira kutuwurok ale lagurukko. Aking kari awiriya nenenga ningi kari biya baguruk, mu nu nenenga ura kari iwita numi bitiruk ale bagurukko. ^{▼▼Luke 22:26-27 Ana saki alo nunga sangornakko: 1 Peter 5:1-5; John 13:12-15.} 27 Kari ilagala imi ningi awuk bore kari biya? Bo daigam na nowoso wore agi, bo sanamaram na nunguru nu tuso wore ya? Mu kari daigam na nowoso borta kari biya. Bare ani ninga ningi bagasam imitang mu ura kari iwita ninga sangaru se bagasam.

28 “Nina aninga ira ariga suen biya ningi agarak bagakasan. 29 Se aninga Ba kingdom aisam turantala, ani kingdom ningarsam. 30 Se nina ani agarak aga kingdom te na yu nalko. Nina daiga kuwim nup ago mu te daigal ale Israel kariimet motam 12 mu nunga tuteralko.

Jesus Peter buring nu tuokko mu balam

(Mat 26:31-35; Mark 14:27-31; John 13:36-38)

31 “Simon, Simon! Satan nina suen la ninga nengemang ningi nunguning menawurokko kaeso, se nu ninga ira arigokko Kaem isuam se aing mam. 32 Bare Simon, ani ni ko ko Kaem maingkala manem, se nika gemang ningi nunguning mu me dagulokko. Se tom ni giris palage ale aking aningate tair, mu ni ka launuria nunga nongomang ningi nunguning ago sokel tuiko.” ^{▼▼Luke 22:32 Giris palaga ale saki alo nunga saonga: Psa 51:10-13; John 21:15-17.}

33 Bare Peter balam, “Kari Biya,” mam, “ani am ngual nikerak talipara ningi namirik ale kerak kuerikkowo!” mam.

34 Bare Jesus nu maonam, “Peter,” mam, “ani nika manorsam, aitakta turom imitang tarak me niaruk la, ni biring ani aisu ale tom ilagala suwan ko balu ni ani me aga ikisam ma balukowo.”

Jesus ko olekem nunga maonam, “Bainat gialko,” mam

35 Jesus ko olekem nunga isuam, “Tom bo ani balem se nina wonong wonong namaman, mu ninga manga mel se karar su me giman, yam namaman. Tom mu te nina mel bo ko tukunang aman agi mena ye?”

Se nuna balman, “Ana mel bo ko me tukunang aman,” maman. ^{▼▼Luke 22:35 Olekem alo wonong wonong namaman: Luke 9:3; 10:4.}

36 Se Jesus aking balam, “Aitakta tom imitang te ani iwita ninga manorsam, nina manga mel karogo agi mu gialko. Se karar karogo agi mu gialko. Ale nina bainat mena agi mu, ningimik guang bo kutuwural ale bainat te diaralko. 37 Mu awuk, ani ninga manorsam, Kaem ko batoga te den ani angimik ko balam mu aitakta ko nunguning aratuwoso. Den mu iwita balam, ‘Nuna nu ko balman, kari memek bita se anira wore nunga bo, ko balman.' ^{▼▼Luke 22:37 Isaiah 53:12.} Nunguningta, den suen la prophet alo ago ko balman mu ko nunguning aratukkowo.”

38 Se olekem alo nu manorman, “Kari Biya, arikko,” maman, “anananga bainat ilagala aniso iweya.”

Se nu balam, “Sumu balman terong mam.”

Jesus Duruk Olive mu te namaram ai ngatangaram

(Mat 26:36-46; Mark 14:32-42)

39 Jesus Jerusalem wonong beteram aolak iluwam Duruk Olive pempem te namakaso mu te aking namaram. Se ko olekem alo kowom karoman ilak namaman. 40 Nu tai kuwim mu te aratam ale ko olekem nunga maonam, “Nina Kaem aru ngatanguru sagaralko, ninga ira ariga bo tairuk se te dagulal bore ko.”

41 Ale nu nunga beteram aolak ilu kasu namaram, ale bugura kulukuam Kaem aru maonam, 42 “O Ba,” mam, “nika gemang buta aniso agi mu, ni yaman ikup aninga irokko taiwoso mu kutuwu saparko. Bare ni aninga ikia se angamang me karo tuiko, ni keta ka ikia se ka gemang mu la karo tuiko.” 43 Asele duruk wonong ko engel bo kote kaparam nu sokel tuam. 44 Jesus ikup biyala nu iram se sokel ago ngatangakaso. Se ko kumik te wolongam aratukaso mu gue iwita aratukaso aliti kapakaso. ^{▼▼Luke 22:43-44 Verse imitang mu den saki girakala batagorman mu te me aniso.}

45 Nu ngatanga kutuwuram, mu barasu sanamaram ale ko olekem nongote peleram namaram, mu nuna aniwaman se nungarkam. Nuna nongomang ninguru batagam se anira nunga moram se animan kueman. 46 Se nungarkam ale nunga maonam, “Nina anape ko ani lagasan a? Nina barasal ale ngatanga se bagaralko, ira ariga bo nengete tairuk se nina te dagulal bore ko.”

Nuna Jesus iluman

(Mat 26:47-56; Mark 14:43-50; John 18:3-12)

47 Jesus den imi am baluwaram la, kari motam biya Judas giram se kowom karoman ilak taiman. Judas mu olekem 12 wore nunga ningi bo. Nu Jesus kote giram aratam, ale kol te musuk maukko kote namaram. 48 Bare Jesus nu maonam, “Judas,” mam, “ni Kari ko Kuriang kol te misikisam sumu kager kari nuguting te betera ko ye?”

49 Jesus ko olekem alo kager kari nu ilumonko tom pingi aram se ikiman, ale isarman, “Kari Biya,” maman, “ana bainat te nunga monak e?” 50 Se olekem bo nu Priest Supuling ko ura kari bo bainat te morukko negeram, ale ko dogowa sengam mu siluwuram.

51 Bare Jesus balam, “Munan sumu patawu saparalko!” mam. Ale kuting garukuam ura kari mu ko dogowa iluwam se nungeram.

52 Se Jesus nu priest bibiya, se temple ko kager kari nunga supuling alo, se kari bibiya nu ilumonko taiman, mu nunga maonam, “Ani tere daong kari se aga iluwalko batir tam manga ago mu giman ago taiman e? 53 Mu ani tom suen biya nengerak temple ningi bagakasam, te aninga iluwalko, bare awuk se nina ani me aga ilukasan? Bare aitak tom imi tiromorom ko tom, se mu nenenga tom nunguning.”

Peter balam, “Ani Jesus me ko ikisam,” mam

(Mat 26:57-58,69-75; Mark 14:53-54,66-72; John 18:12-18,25-27)

54 Nuna Jesus iluman ilak nama Priest Supuling ko kawam ningi kasu naguman. Se Peter kowom kaoram namaram, bare nu awar nuam aolak ilu namakaso. 55 Kari saki kawam mu ko kar ningi tama uwiman ale duap te dagiwaman. Se Peter tama duap te arungu daigam bagaram. 56 Se ura imet bo nu arigam ale ninguru koma arigam ale balam, “Kari imitang Jesus ilak dugu karokaso,” mam.

57 Bare Peter balam, “Imet,” mam, “ani kari sumu me ko ikisam.”

58 Tom me maiyam se kari bo aking tairam arigam ale maonam, “Ni agotala Jesus ko kari bo,” mam.

Bare Peter balam, “Kari, ani noko bo mena!”

59 Udagi te tom katirta hour suwanta iwita namaram, se kari bo tala tairam ale Peter arigam, ale sail ago balam, “Nunguningta nunguningkiri, kari imi Jesus ilak bagakaso. Mu awuk, nu agotala Galilee kari.”

60 Bare Peter balam, “Kari,” mam, ”ani nika den balsam sumu me ko ikisam!” mam. Nu uwuta baluwaram se tarak niaram. 61 Se Kari Biya punga geragam Peter arikuawuram. Se Peter Jesus ko den nu giram maonam ale balam, “Turom imi te tarak me niaruk la, ni biring ani aisu ale tom ilagala suwan balu ni ani me aga ikisam ma baluko,” mam, mu Peter den mu kuamin te tairam. 62 Se ko aratam ale ninguru niakaso.

Nuna Jesus gusirukasan ale moakasan

(Mat 26:67-68; Mark 14:65)

63 Kari Jesus iluman ilak bagakasan mu gusia den manarukasan ale moakasan. 64 Ale ko motam mu guang biling te kaloman, ale isarukasan, “Ni prophet agi mu awiri ka moso mu nup baluko!” makasan. 65 Ale nuna den memek suen biya karogo manaru se gusirukasan.

Jesus Sanhedrin kari bibiya nomokete sanamaram

(Mat 26:59-66; Mark 14:55-64; John 18:19-24)

66 Sor ukiram se Juda nunga kari bibiya, priest bibiya, se Law Den ko kausa kari bibiya tai biguwuman. Se Jesus taman ilak nongote namaman. 67 Se nuna nu manorman, “Ni Kristus agi mena wore nanga manaruko.”

Se nu nunga maonam, “Ani ninga manik bare nina me nengemang ningi nunguning arukko. ^{▼▼Luke 22:67 Jesus maingkala biya wetang te nunga maonam: John 10:24-26.} 68 Se betela ani isa bo ningarik mu nina den koma me balalko. 69 Bare aitak se tom udagi, Kari ko Kuriang mu Kaem Biya Sokel Ago mu ko kuting sengam mu te dagiwurukkowo.”

70 Se nuna suen la nu isarman, “Se ni nunguningta Kaem ko Namar e?” ma balman.

Se nu nunga maonam, “Nengeta ta balsan ta, mu anigita.”

71 Se nuna balman, “Ana den bo agotala me ikinakko. Nu kota ko kuring te den imi balam se ana ikiman ta!” maman.